Kompania kërkon punëtorë me pagë minimale nga 1600 euro, por nuk ka pasur asnjë kandidat

Një kompani në Itali ka apeluar për vende të lira pune si inxhinierë mekanikë projektues, dizajner dhe punëtorë për punë mekanike në zdrukthtari, në kontrollin e cilësisë së produktit apo edhe për pozicione të tjera.

“La Repubblica” tregon se si kompania “Antonio Carraro” e specializuar për ndërtimin e traktorëve për bujqësinë e specializuar në zonën e Padovas në Itali nuk po arrin prej mëse 6 muajsh të gjejë punëtorë.

“Jemi një nga tre kompanitë e Venetos me paga mesatare më të lartë. Minimumi që ofrojmë është 1590 euro. Kemi bërë investime teknologjike të nivelit të lartë që kanë kushtuar 10 milionë euro”, tregon drejtori i kompanisë në fjalë.

Por cila është arsyeja që nuk po shkon asnjë kandidat prej gjashtë muajsh në këtë kompani? “Mbase të rinjtë janë të demoralizuar dhe kanë një ide të gabuar se çfarë do të thotë të punosh në një kompani metal mekanike” përgjigjet drejtori i kompanisë.

Gjithsesi, kompania ka gjetur mënyrën më të mirë për të mbuluar mungesën e madhe të punëtorëve, duke ndjekur një model digjital që redukton ndjeshëm numrin e punonjësve.

“Tekniku nuk ka nevojë më të bëjë pis duart pasi nuk është në shërbim të makinerisë por është makineria në shërbim të tij”, shton drejtori.