LIGJET E BIZNESIT
Ish-kryeministri Sali Berisha ka dalë sot në një konferencë për shtyp, ku u shpreh se kriza energjitike nuk ka shkak as motin apo luftën në Ukrainë, por grabitjen që i është bërë këtij vendi dhe sipërmarrjeve në 9 vite nga qeveria e Ramës.
Në tryezë ndodhen dhe ekspertët, në të cilën Berisha theksoi se qeveria ka shitur energjinë me 42 euro dhe rezervat ujore po keqmenaxhohen.
“Rritje absurde e energjisë për konsumatorët. Jo vetëm është ujore por ajo prodhohet me kosto më të ulët se në çdo vend tjetër të kontinentit. Prodhimi i energjisë gjatë vitit 2021 është më i larti në rekord historik 8.9 miliardë kë/ orë.
Pra, duke pasur parasysh këto faktorë dhe nëse analizojmë qëndrimin në menaxhimin e rezervës ujore të kaskadës kostatohet se shkaku kryesor i krizës nuk është moti apo lufta por është absolutisht grabitja në këto sipërmarrje.
Shqipëria, nuk besoj që ka vend tjetër që zbraz digat në kundërshtim të ligjit . Blihet energji me 300 euro në një kohë kur atë ditë për furnizim është blerë me 150 euro, pra kemi të bëjmë me një rritje çmimesh të diktuara nga vjedhja dhe keqmenaxhimi.
Ai që shiti energjinë me 42 euro kur në bursë kuotohej me 130 euro, ndau para me blerësin. Çfarë qëndron tjetër në themel të krizës, qëndrimi i papërgjegjshëm pasi në 9 vite nuk është siguruar një burim i vetëm energjie përvec atyre ujore të kontraktuara më parë, në një kohë kur potencialet i kishte të jashtzakonshme.
Nuk them të mos ndiqte kjo qeveri çuarjen më tej të shfrytëzimit të burimeve ujore por duheshin diversifikuar burimet energjitike. Një vend i cili renditet i dyti apo i treti në Mesdhe dhe Europë për ditët me diell, ka terrenet më të përshtatshme për panele, por në 9 vite nuk është realizuar asgjë”-tha Berisha.
