Kërkohet dorëheqja e ministres, pas aksidentit ku tha se ‘fëmija u përplas me makinën time’

Kryeministri Albin Kurti ka reaguar lidhur me aksidentin që ndodhi mesditën e së dielës, kur ministrja Rozeta Hajdari përplasi një fëmijë të mitur në rrugë.

Kurti u shpreh se në rrugë nuk kishte shenja frenimi duke justifikuar kështu ministren se nuk ishte me shpejtësi më të lartë se sa duhej.

Megjithatë, shprehu keqardhje për aksidentin në të cilin është lënduar fëmija.

“Unë nuk kam të tjera informacione përveç sqarimeve që i ka thënë Hajdari dhe më duhet të them se i besoj. Ka qenë bashkë në veturë me motrën e saj me aftësi të kufizuara dhe me çka kam kuptuar nuk ka shenja në asfalt të frenimit, që do të thotë se nuk ka pasur shpejtësi më tepër se ç’duhet. Policia e ka rastin dhe kamerat e marketit janë aty”, tha Kurti.

Aksidenti ndodhi mesditën e së dielës ku e mitura e moshës 9-vjeçare u dërgua për trajtim mjekësor e pastaj u lirua meqë lëndimet nuk ishin serioze.