Në seancën e sotme plenare ish-kryeministri Sali Berisha kërkoi që të futet në rendin e ditës problematika e çmimeve.
Ai e cilësoi platformën për kontrollin e çmimeve të bërë nga qeveria në bashkëpunim me grupet mafioze për të zhvatur xhepat e qytetarëve.
Por Berishës iu ndërpre fjala nga kryetarja e Kuvendit Lindita Nikolla, e cila i kujtoi se e kishte marrë fjalën për procedurë dhe nuk mund ta përdorte për të bërë propozime për të ndryshuar rendin e ditës në Kuvend.
Berisha: Kjo anketë e re dëshmon se qytetarët mendojnë se qeveria është bërë një me grupet mafioze dhe e gjithë platforma e shpallur për kontrollin e çmimeve është platformë për grabitjen e xhepave të qytetarëve. Shkoni bisedoni me bukëpjekësit, me pastiçierët dhe me barmanët, çfarë thonë.
Pse u mërzit ju kjo statistikë. A e kuptoni ju se çdo shqiptarë sheh këtu një grup shushunjash që i janë sulur xhepave të tyre dhe po u thithin gjakun. Nga ana tjetër këta deklarojnë se po i lumturojnë.
Lindita Nikolla: Kjo nuk është procedurë, ju ndërpresim fjalën. Po ju kujtoj rregulloren zoti Berisha, propozimi për ndryshimin e rendit të ditës duhet të paraqitet me shkrim.
