Guvernatori i Bankës së Shqipërisë, z. Gent Sejko, ka marrë pjesë në Mbledhjet e Pranverës të Fondit Monetar Ndërkombëtar (FMN) dhe të Grupit të Bankës Botërore (BB), në Uashington. Këto mbledhje organizohen me pjesëmarrjen e guvernatorëve të bankave qendrore dhe ministrat e financave të vendeve anëtare, si dhe drejtues të lartë të institucioneve ndërkombëtare financiare.
Përfaqësuesit e FMN deklarojnë se ekonomia globale është në rritje por pandemia dhe lufta në Ukrainë kanë bllokuar tregjet financiare duke ngadalësuar këtë rimëkëmbje. Po ashtu, rritja e çmimeve shihet si faktor i frenimit të vrullit global të ekonomisë duke shkaktuar pasoja financiare në xhepat e konsumatorëve, pa harruar këtu edhe krizën enegjitike si faktor.
Gjatë këtyre takimeve, Guvernatori Sejko, i njohu të pranishmit me zhvillimet më të fundit në ekonominë shqiptare. Sipas Sejkos ekonomia shqiptare u godit në mënyrë të njëpasnjëshme, fillimisht duke u përballur me tërmetin e vitit 2019, e më pas pandemia e cila filloi në vitin 2020 me pasojat e së cilës vijojnë edhe në vitin 2022. Po ashtu Guvernatori u ka thënë ndërkombëtarëve se me nisjen e sulmit ushtarak të Rusisë ndaj Ukrainës dhe krizën ndërkombëtare të çmimeve, ky vit vijon të jetë i vështirë ekonomikisht.
Sa i përket inflacionit në Shqipëri, Sejko tha se pritet të qëndrojë mbi objektivin e Bankës gjatë vitit 2022, në pasqyrim të goditjeve që vijnë nga çmimet e rritura në tregjet ndërkombëtare, megjithatë, kjo goditje do të ketë efekte të përkohshme. Në këtë kontekst, Guvernatori theksoi se rritja e çmimeve në tregjet botërore dhe reduktimi i kërkesës së huaj, do të shoqërohen me norma më të larta inflacioni dhe rritje më të ngadaltë ekonomike krahasuar me vlerësimet e mëparshme të Bankës.
Përfaqësuesit e lartë të FMN-së dhe BB-së vlerësuan pozitivisht rolin dhe politikën e ndjekur nga Banka e Shqipërisë, në zhvillimin makroekonomik dhe stabilitetin financiar të vendit. Ata inkurajuan Bankën e Shqipërisë të vijojë monitorimin e vazhdueshëm të situatës, si dhe koordinimin e politikave nga autoritetet shqiptare duke marrë masat e nevojshme në kohën e duhur. Më në veçanti, përfaqësuesit e FMN-së mbështetën vendimin e Bankës së Shqipërisë për rishikimin e qëndrimit të politikës monetare.
