Ai mbeti jetim kur ishte vetëm tre vjeç por sot është një nga njerëzit me të pasur në botë. Por lidhjet e afërta me presidentin rus Vladimir Putin i kanë hequr atij aksesin nga bizneset e tij duke dëmtuar edhe reputacionin që ka krijuar ndër vit në botën e biznesit.
“Jam i sigurt se njerëzit do të fokusohen te unë për tre ose katër ditë por do të kalojë”, tha miliarderi në vitin 2003 kur bleu klubin e Chelsea.
Sot Mbretëria e Bashkuar ka ngrirë të gjitha asetet e tij në territorin e saj duke përfshirë këtu edhe klubin e futbollit.
Kjo qeveri e cilëson Abramovich si bashkëpunëtor me Vladimir Putin në lëvizjet e tij për pushtimin në Ukrainë.
Kush është Roman Abramovich
Ai lindi në Saratov në Rusinë jugperëndimore, qindra milje larg kufirit me Ukrainën në vitin 1966. Nëna e tij Irina vdiq nga helmimi në gjak kur ai ishte një vjeç ndërsa babai i tij vdiq dy vite më vonë në një aksident me një vinç ndërtimi. Pas kësaj Abramovich u rrit nga të afërmit duke kaluar në Komi, Rusinë veriperëndimore ku standardi i jetesës ishte më i ulët për shkak të varfërisë.
“Të them të vërtetën, nuk mund ta quaj fëmijërinë time të keqe”, tha ai pak kohë më parë në një intervistë të rrallë për The Guardian.
Ai la shkollën në moshën 16-vjeçare, punoi si mekanik dhe shërbeu në ushtri përpara se të shiste lodra plastike në Moskë. Ai e nisi biznesin e tij me parfume dhe deodorantë, duke ndërtuar pasurinë e tij pasi hapja më e madhe nën udhëheqësin sovjetik Mikhail Gorbachev u dha më shumë hapësirë sipërmarrësve.
Shpërbërja e Bashkimit Sovjetik, dhe bashkë me të komanda shtetërore e aseteve minerale, ofruan më shumë mundësi dhe në mesin e të 20-tave, Abramovich pati një fat të mirë.
Ai mori kompaninë e naftës Sibneft nga qeveria ruse në një ankand të manipuluar në vitin 1995 për rreth 250 milion dollarë (190 milion £). Ai ia shiti atë qeverisë për 13 miliardë dollarë (9.9 miliardë £) në vitin 2005.
Avokatët e tij thonë se nuk ka asnjë bazë për të pretenduar se ai ka grumbulluar pasuri përmes kriminalitetit. Megjithatë, në vitin 2012, ai pranoi në një gjykatë në Mbretërinë e Bashkuar se kishte bërë pagesa korruptive për të ndihmuar në realizimin e marrëveshjes Sibneft.
Ai u përfshi në “betejat e aluminit” të viteve 1990, në të cilat oligarkët që kishin grumbulluar pasuri të mëdha dhe pushtet politik pas rënies sovjetike, luftuan për kontrollin e kësaj industrie të madhe.
“Çdo tre ditë, dikush vritej,” tha Abramovich në vitin 2011, duke shtuar se ky kërcënim për sigurinë e tij e kishte bërë atë më ngurrues.
Hyrja në politikë
Ai u bë një aleat i presidentit Boris Yeltsin dhe një lojtar në skenën politike post-sovjetike të Moskës, madje duke pasur një apartament në Kremlin.
Kur Jeltsin dha dorëheqjen në vitin 1999, Abramovich thuhet se ishte ndër ata që mbështetën kryeministrin dhe ish-spiunin e KGB-së, Vladimir Putin, si pasardhësin e tij.
Pasi Putin erdhi në pushtet ai u përpoq të vendoste dominimin e tij mbi oligarkët. Disa shkuan në burg dhe të tjerët u internuan nëse nuk kishte treguar besnikëri ndaj tij.
Në vitin 2000, Abramovich u zgjodh guvernator i rajonit të Chukotka, në skajin verilindor të Rusisë. Ai fitoi popullaritet pasi investoi paratë e tij në shërbimet sociale, por dha dorëheqjen në vitin 2008.
Një hap drejt Londrës
Në një lëvizje të pazakontë për një njeri të përshkruar gjerësisht si i qetë, madje i ndrojtur, në vitin 2003, Abramovich u bë i famshëm në mbarë botën e futbollit kur bleu Chelsean, klubin më të madh të Londrës perëndimore, në një marrëveshje me vlerë 140 milionë funte.
_123641216_b6aec8f3-a44a-4831-bdbc-3f48fe5c6a15
“E gjithë filozofia ime në jetë është të sjell ekipe profesionale. Në Chukotka kam ekipe profesionale në terren dhe këtë do ta bëj edhe këtu”, tha ai në një intervistë për Financial Times në atë kohë.
Nën drejtimin e Jose Mourinhos dhe trajnerëve të tjerë, pasuria e Abramovich ndihmoi Chelsean drejt shumë triumfeve.
