“Ne nuk na gjunjëzoi tërmeti apo pandemia” Rama i bindur: Nuk do ta bëjë as rritja e çmimeve (VIDEO)

Nga Manza, kryeministri Edi Rama tha se qeveria do të kompensojë çmimin e energjisë elektrike, pavarësisht se sa do të jetë në bursa.

Ai shtoi se nuk mundet që ti faturohet goditja e krizës familjeve shqiptare, përfshi pensionistëve, atyre në nevojë apo edhe atyre me të ardhura mesatare.

“Ne do të bëjmë më të mirën edhe për këtë krizën e shkaktuar nga lufta në Ukrainë, e cila ka ndikuar zinxhir në rritjen e çmimeve. Do të veprojmë njësoj sikundër kemi vepruar në rastet e mëparshme. Nuk jemi në kushtet kur bombat i kemi mbi kokë, viktimat dhe plagët e luftës janë gjetkë, gjithsesi lufta sjell plagët e saj përmes çmimeve. Edhe këtë vështirësi të madhe do e kapërcejmë sëbashku”, tha Rama.

Duke u ndalur te procesi i rindërtimit, Rama tha se ne u zotuam që lekët do i nxirrnim nga dheu, dhe banesat do ti bënim më të mira se sa ishin.

“Ne nuk i planifikojmë apo parashikojmë me përpikmëri ngjarjet apo punët që bëjmë, por një gjë është e sigurtë se kur unë them që do e bëjmë një punë, ne e bëjmë”, tha Rama.

Ai u shpreh se Qeveria do të mbështesë për 1 vit fermerët pa taksa, duke i ardhur në ndihmë kështu lidhur me rritjen e çmimeve, sikundër nuk do të lemë askënd pa e ndihmuar në këtë situatë që e ka krijuar lufta.

Rama tha se ne nuk u gjunjëzuam as nga tërmeti as nga pandemia dhe nuk do të gjuhnjëzohemi as nga kjo situata e tanishme, por do të ecim me kokëfortësi përpara.