“Marramendje, dhimbje gjoksi” Ja simptomat që mund të përjetoni nga ndërrimi i orës

Sot është rikthyer ora verore, ku akrepat kanë shkuar 60 minuta para.

Ndryshimi erdhi në 02:00 të natës, duke bërë që ata të cilët duhet të ishin në punë këtë mëngjes, të kenë humbur një orë gjumë.

Një studim i kryer në vitin 2020 zbuloi se humbja e një ore gjumi për shkak të ndërrimit të orës, rrit numrin e personave që kanë nevojë për shtrim në spital për shkak të një gjendje serioze të ritmit të zemrës të njohur si fibrilacion atrial.

“Daily Mail” shkruan se gjendja shkakton rreth 16,000 goditje në vit. Shkencëtarët kanë frikë se humbja e një ore gjumë është e mjaftueshme për t’i bërë disa persona që vuajnë nga zemra që të kenë nevojë për trajtim urgjent, sepse efekti në ritmin e tyre cirkadian, ose ndryshe në orën e trupit, bën që rrahjet e tyre të zemrës të çrregullohen.

Studimi, nga ekspertët në Kolegjin e Mjekësisë Albert Einstein në Nju Jork dy vjet më parë, mbështeti kërkimet e mëparshme që sugjeronin se sulmet në zemër rriteshin në ditët pas ndërrimit të orës dimërore në atë verore.

Por ndërrimi i orës në vjeshtë nuk duket të ketë të njëjtin efekt, raportuan shkencëtarët.

Fibrilacioni atrial zhvillohet kur aktiviteti elektrik në zemër çrregullohet, duke bërë që ajo të rrahë në mënyrë të parregullt.

Simptomat përfshijnë dhimbje gjoksi, marramendje dhe lodhje, por një numër i konsiderueshëm i të sëmurëve nuk e kuptojnë derisa pësojnë një goditje.