“Kafshoni një copë ballokume” Artan Fuga komenton paketën e Rezistencës Sociale: Thërrime për të varfrit, nuk preken fitimet e të pasurve

Pas paketës së Rezistencës Sociale të prezantuar nga kryeministri Edi Rama për krizën ekonomike dhe rritjen e çmimeve, ka reguar dhe akademiku Artan Fuga.

Ai e krahason këtë paketë me një copë ballokume dhe thotë se mbështeten me thërrime shtresa më në zgrip të shoqërisë dhe nuk preken në asnjë përqindje fitime shtresat e pasura, kurse shtresat e mesme tërësisht të lëna në mëshirën e fatit!

REAGIMI I PLOTE

Na! Kafshoni një copë ballokume!
Shoh këtë paketën e asaj që u quajtka rezistenca sociale e shpallur sot ditën e Ballokumes!

Të merr frika!
Në fillim rrëmben emrin e “rezistencës”, tallje e madhe, këtu edhe rezistencën e bën qeveria, jo qytetari!
Po kush po pyet për emërtime!
Ajo që shoh është e frikshme! Mbështeten me thërrime shtresa më në zgrip të shoqërisë dhe nuk preken në asnjë përqindje fitime shtresat e pasura, kurse shtresat e mesme tërësisht të lëna në mëshirën e fatit!
E pra, ato janë baza e një shoqërie demokratike! Jo rastësisht goditen, lihen në mëshirën e fatit, ekspozohen ndaj ashpërsisë së jetës, fyen, injorohen. Sepse ato kanë mundësi të formojnë një mendim alternativ, ato formojnë shtresa proevropiane e integruese, ato rivalizojnë pushtetarët, ato mund të drejtojnë ndryshe shoqërinë!
Jo, jo, dru atyre, mjafton një ekran televizori që të shohin liderin varfanjakët pa pasur nevojë të dalin jashtë, që jetojnë me ndihma sociale, të japin votën në fund të mandatit sikurse marrin pagën e turpit në fund të muajit, dhe kaq!
Ecim dhe marshojnë!
Na bëftë mirë ballokumja sepse aq ishte ndihma e rezistencës sociale!