“Jam koleksionist” Policia i zbuloi 4 mijë vepra arti në banesë, arrestohet 61 vjeçari në Tiranë (VIDEO)

Policia e Tiranës arrestoi sot 61 vjeçarin Artan Koçiu.

Në banesën e tij në rrugën “Shyqyri Brari” u gjetën mbi 4 mijë vepra arti.

Koçiu akuzohet për veprat penale ‘Vjedhje e veprave të artit e kulturës’, dhe ‘Trafikimi i veprave të artit dhe kulturës’.

Në dëshminë e tij pas ndalimit dhe shoqërimit, në komisariat, Koçiu përpara OPGJ-ve ka deklaruar se është restaurues i veprave të artit. Më tej ai ka shtuar se veprat e artit nuk i ka vjedhur por është koleksionues i tyre dhe i ka blerë ato.

Nderkohe Vazhdon puna me Ministrinë e Kulturës për inventarizimin e tyre dhe përcaktimin e atyre që janë pjesë e trashëgimisë kulturore dhe përcaktimin e objekteve ku janë marrë apo vjedhur si Kishat Ortodokse në Shqipëri, Greqi e Maqedoni Veriore.

“Specialistët e Seksionit për Hetimin e Trafiqeve, në vijim të punës për goditjen e paligjshmërisë, pas një pune të mirëfilltë hetimore disajavore, organizuan dhe finalizuan me sukses operacionin policor të koduar “Cultural Heritage”, në kuadër të të cilit u bë arrestimi në flagrancë i shtetasit:

– A. K., 61 vjeç, banues në rrugën “Ali Demi”, për veprat penale “Vjedhja e veprave të artit e kulturës”, dhe “Trafikimi i veprave të artit dhe kulturës”.

Shërbimet e Policisë, gjatë kontrollit të ushtruar në një apartament në pronësi të këtij shtetasi, në rrugën “Shyqyri Brati”, kanë gjetur rreth 4.000 sende të dyshuara si pasuri kulturore të luajtshme.

Në bashkëpunim me specialistët dhe ekspertët e Institucioneve të Specializuara në Ministrinë e Kulturës vijon puna për inventarizimin e këtyre objekteve dhe dokumentimin e plotë të kësaj veprimtarie kriminale.

Materialet i kaluan Prokurorisë së Rrethit Gjyqësor Tiranë, për veprime të mëtejshme procedurale”, njoftimi i plotë i policisë.

Po kush është Artan Koçiu?

Edhe më herët ai ka qenë i arrestuar për të njëjtën vepër penale. Në vitin 2013 ai do të arrestohej për përvetësim të veprave të trashëgimisë kulturore.

Koçiu është arrestuar në kuadër të operacionit të koduar ‘Ikona’ së bashku me dy persona të tjerë, Gjergji Thimon dhe Arben Spahon.

Në atë kohë, Gjegji Thimo dhe personat e tjerë të arrestuar përfshirë edhe Koçiun hodhën poshtë akuzat, duke theksuar se veprat e artit të sekuestruara nga policia janë koleksion i mbledhur prej vitesh madje edhe me leje të Ministrisë së Kulturës.