Çudira alla shqiptare, rritja e naftës ngre dhe çmimin e gomerëve

Rritja e çmimeve duket se po reflektohet kudo. Tanimë edhe fermerët po u kthehen transportit me mushkë, kalë, apo gomar.

Mirëpo, edhe çmimi i gomerëve e mushkave si duket ka pësuar rritje. Tefiku, një fermer në Mallakastër ka pohuar se është rritur dhe çmimi i gomerëve dhe mushkave.

Çmimi i tyre është rritur si pasojë e rritjes së çmimit të karburanteve ku litri shkon në 217 lekë për litër. Çudi, por ja që ndodh.

Ai shprehet se një gomar shitet me 50 mijë lekë të reja e një mushkë 150 mijë lekë të reja por më e keqja është se nuk gjen dot.

“Mushka e gomari të bëjnë shumë punë sot, ku ta gjesh, por s’ia di njeri gomarit të shkretë. 500 bën gomari, mushka është 1 milion e gjysmë,”- thotë ai.

Përmendim që shqiptarët po protestojnë për rritjen e çmimit të ushqimeve, por si duket duhet të shtojnë dhe rritjen e çmimit për gomerët e gomaricat. Mbetet për t’u parë se çfarë do të ndodhë në vijim.