LIGJET E BIZNESIT
Një shofer i cili po ngiste një makinë luksoze dhe ka bërë manovra të rrezikshme si xhirim gomash, drift e gara shpejtësie ka marrë një gjobë prej 50 mijë lekësh.
Pamjet kanë bërë xhiron e rrjetit, ndërsa policia ka mundur të gjejë se kush është personi në fjalë dhe më pas ta ndëshkojë atë.
Ngjarja është shënuar më 31 janar të këtij viti ku rreth orës 22:00, BMW – X5 me targa AB 101 OM nuk ka rregulluar shpejtësinë me mjet duke bërë xhirime gomash dhe drift. Shoqërimi i shoferit është bërë një ditë pas publikimit të videos.
NJOFTIMI ZYRTAR I POLICISE
Në datë 31.01.2022 rreth orës 22:00 në rrjetet sociale janë hedhur pamjet filmike ku mjeti marka BMW – X5 me targa AB 101 OM nuk ka rregulluar shpejtësinë me mjet duke bërë xhirime gomash dhe drift.
Në datë 01.02.2022 nga shërbimet e Komisariatit Rajonal Policisë Rrugore është bërë e mundur gjetja e mjetit dhe është bërë shoqërimi dhe ndalimi i mjetit në Komisariatin Rajonal Policisë Rrugore.
Është marrë masa administrative me vlerë 50 000 (pesëdhjetë mijë) lekë për shkelje të Ligjit Nr 8378 datë 22.07.1998 “Kodi Rrugor Republikës Shqipërisë” i ndryshuar, neni 139 paragrafi 3 dhe neni 93 paragrafi 1, 3 dhe 5.
Komisariati Rajonal Policisë Rrugore është i hapur për qytetarët për denoncimin e e kundërvajtjeve rrugore me qëllimin ndëshkimin e drejtuesve të mjeteve të cilët shkelin rregullat e qarkullimit rrugor me qëllim krijimin e një mjedisi sa më të sigurt për përdoruesit e rrugës dhe për të rritur besueshmërinë tek qytetarët.
