Menjëherë pas nisjes së sulmit ushtarak rus ndaj Ukrainës, Ministri i jashtëm i Ukrainës, Dmytro Kuleba, ka postuar në rrjete sociale një “listë detyrash” për komunitetin ndërkombëtar në përgjigje të sulmit të Rusisë.
Sipas tij “bota duhet të veprojë menjëherë” dhe “e ardhmja e Evropës dhe e botës është në rrezik”. Në postim, ministri apelon për “sanksione shkatërruese” të menjëhershme, duke përfshirë këtu ndalimin e Rusisë nga përdorimi i sistemit të transaksioneve financiare SWIFT.
Ai vijon më tej duke shkruar se bota duhet të “izolojë plotësisht Rusinë”, duke i ofruar Ukrainës armë dhe pajisje, ndihmë financiare dhe ndihmë humanitare.
