Qytetarët në Belgjikë do të mund të zgjedhin që katër ditë të javës të punojnë në kuadër të një sërë reformash, që po bëhen në tregun e punës që janë paralajmëruar sot.
Pakoja e reformave që është propozuar dhe miratuar nga koaliconi i gjerë në këtë vend, u jep të drejtë punëtorëve që gjithashtu të fikin pajisjet elektronike dhe të injorojnë mesazhet lidhur me punën.
Të gjitha këto mund të bëhen jashtë orarit të punës pa pasur frikë për ndonjë pasojë.
“Kemi pasur dy vite të vështira. Me këtë marrëveshje jemi bërë gardian të ekonomisë që çdo herë është më inovative, e qëndrueshme dhe digjitale. Qëllimi është që punonjësit dhe kompanitë të jenë më të fuqishme”, tha kryeministri belg Alexander de Croo gjatë një konference për media.
“Freelancerat” gjithashtu do të kenë mbrojtje më të madhe juridike karshi rregullave të reja, derisa punonjësit me orar të plotë mund të punojnë me një orar më fleksibil varësisht nga preferencat e tyre.
Aplikimi i reformave megjithatë mund të kërkojë muaj të tërë, pasi ligji duhet të kalojë në lexim të parë nga ana e deputetëve – para se të hyjë në fuqi.
Me këtë ligj, punonjësit në sektorin privat por edhe ata publik do të jenë të barabartë në çdo aspekt – duke filluar nga mbrojtja juridike e privilegjet e tjera.
