Pse heshti për problemet kur ishte zv/kryeministër? Erion Braçe tregon se çfarë e pengonte të fliste me liri të plotë

Ish.zv kryeministri Erion Braçe, aktualisht deputet i Partisë Socialiste, foli për reagimet e tij në lidhje me problematika  të ndryshme në vendin tonë, sidomos në fushën e bujqësisë.

I pyetur se përse nuk e ngrinte zërin për këto çështje edhe kur ishte në qeveri, ai tha se mesazhet e tij kanë qenë të njëjtat dhe atëherë, por lirinë e plotë ia pengonte  Kodi Etik i Këshillit të Ministrave.

“Heshtja ime? Po për çfarë? Kur je brenda një qeverie, ditën e parë të japin 2 dokumenta, kodin etik të Këshillit të Ministrave dhe Kushtetuën, përveç betimit duhet të respektosh disa rregulla. Dhe kam qenë korrekt si me Kushtetutën dhe Këshillin e Ministrave.

Unë gjithmonë gjërat i kam thënë me zë të lartë, si brenda ashtu dhe jashtë qeverisë. I them tani se kam gjithë lirinë që më parë ma kishte penguar kodi etik i Këshillit të Ministrave.

Pysni kolegët e mi për të gjitha këto çështje, edhe kryeministrin për kontestimet e mia, me të dhe të tjerë njerëz,”  tha Braçe për Top Neës.