Avokati i ish-ministrit të Brendshëm Saimir Tahiri ka treguar se trupa gjykuese që dënoi klientin e tij ishte e ndikuar dhe nën presion për të dënuar atë me 3 vite e 4 muaj burg.
Ai shtoi se ka qenë një grup apo një individ që kishte ndikuar tek gjyqtarët me qëllim njollosjen e figurës së Tahirit.
Ndër të tjera Haxhia deklaroi se vendimi është marrë në momentin e fundit në dhomën e këshillimit.
“Kam kurajën ta them që ai trup gjykues ishte profesionalisht i vendosur në cilësi të larta, nuk mund të them që janë të paaftë. Atyre gjyqtarëve që e njihnin dosjen në detaje, është e pafalshme të merrnin atë vendim. Ata lejuan të mendohet se diçka ka ndodhur në seancën e fundit në momentin që ata kanë folur në dhomën e këshillimit. Unë jam i bindur se ai trup gjykues ka qenë i ndikuar dhe në presion për të marrë këtë vendim.
Qëllimi është, nisur nga fakti se dosja e Tahirit në përbërje të saj ishte një hap i sigurt në Gjykatën e Lartë që do merrej pafajësi, për mua segmente apo individë, ky grup që ka hyrë donte njollosjen e Tahirit dhe futja në burg e tij ia vështirësonte punën, e vinte Gjykatën e Lartë para faktit se dikush është në burg dhe duhet të matemi mirë për të marrë një vendim dhe realizoi veçimin përfundimisht nga politika sepse u njollos.
Kjo bën të arrijmë në përfundimin se vendimi nuk është shprehje vullnetit të trupës së gjyqtarëve. Unë po të kem të dhëna të sakta e them që është ky grup apo ky individ”,-tha avokati i njohur ndër të tjera.
