Dervishi: Rritja e çmimit të karburanteve, efekt zinxhir në ekonomi. Pasojat i vuajnë qytetarët

Rritja e çmimit të karburanteve sjell një efekt zinxhir që ndikon jo vetëm te drejtuesit e automjeteve, por te të gjithë qytetarët dhe ekonomia e vendit. Kështu u shpreh në studion e A2 Business me gazetaren Aurora Sulçe, eksperti për hidrokarburet Dael Dervishi. Sipas tij është shumë komode dhe praktike të marrësh taksa nga nafta për shkak të tregut të formalizuar.

“Të marrësh taksa nga nafta është komode dhe praktike. Është një nga tregjet më të formalizuar tregu i karburanteve dhe është kollaj të llogarisin sa naftë shpërndahet dhe të llogarisin tatim-fitimin. Efektet që krijon nafta jo vetëm te drejtuesit e automjeteve, por te gjithë ekonomia. Ndikon te konsumi dhe rritja ekonomike e një vendi sjell efekt zinxhir. Pasojat i vuajnë të gjithë qytetarët”.

Teksa paralajmërohet rritja e çmimeve, Dervishi rekomandon kryerjen e një sërë reformash. Sipas tij qeveria duhet të kryejë një studim të kujdesshëm në lidhje me prekjen e taksave dhe planifikimin buxhetor.

“Që të vendoset se në cilat hapësira duhet ndërhyrë mendoj se duhet ndërmarrë një studim i kujdesshëm nga ana e qeverisë se parashikimi buxhetor që ka bërë qeveria duhet të dalë në fund me të njëjtin rezultat nëse do t’i heqë nga nafta duhet të gjejë se nga cili xhep t’i marrë. Mund të preken disa taksa. Ne përmendëm Maqedoninë e Veriut është sistemi me i suksesshëm në rajon. Deri sa të arrijmë ne atje kërkohen një sërë reformash. Ka disa ente rregullatorë. Nuk i kemi ato infrastruktura ligjore rregullative dhe monitoruese që ka RMV. kërkohen një sërë reformash nuk janë zgjidhje afatshkurtra”.A2