“Alo, Policia?”, 654 denoncime nga qytetarët brenda javës, aksion në kryeqytet

Policia e Shtetit ka publikuar të dhënat e javës që lamë pas. Në një postim në rrjetet sociale Policia njoftuar se me ndihmën e qytetarëve të cilët kanë dërguar në Komisariatin dixhital 654 denoncime, efektivët e Policisë janë organizuar në terren, ndërkohë që së fundmi në “lojë” janë futur edhe rrjetet sociale.

Vetëm në dy ditët e fundit janë parandaluar ngjarje rrugore që mund të shkaktonin pasoja të rënda, pasi disa drejtues mjetesh janë denoncuar nga qytetarët se po kryenin manovra të rrezikshme.

Në momentin që janë ndaluar, është kuptuar se ishin në gjendje të dehur, ndaj dhe janë vënë në pranga. Bëhet fjalë për: O. S., dhe E. Gj.

Njoftimi i plotë:

DVP Tiranë/Përgjatë një jave, vetëm për kryeqytetin, 654 denoncime nga qytetarët.

Policia Rrugore e Tiranës në bashkëpunim dhe me struktura të tjera të DVP Tiranë, fokus të punës dhe reagim në kohë edhe ndaj shkelësve të rregullave të qarkullimit rrugor, që konstatohen dhe adresohen me pamje nga qytetarët në rrugët e kryeqytetit.

Prej kohësh, falë bashkëpunimit me qytetarët, Policia Rrugore e Tiranës, po ndjek me kujdes të gjjtha raportimet e Komisariatit Dixhital, denoncimet e qytetarëve, postimet e rrjeteve sociale, nëpërmjet të cilave provohen shkelje të ndryshme të rregullave të qarkullimit rrugor, të cilat më pas ndiqen në terren dhe procedohen sipas dispozitave të parashikuara në Kodin Rrugor.

Gjjthashtu, janë vlerësuar në kohë informacionet e qytetarëve në lidhje me shkelje të rrezikshme, ku vetëm dy ditët e fundit, falë reagimit të shpejtë dhe profesional, janë parandaluar ngjarje rrugore që mund të shkaktonin pasoja të rënda, pasi disa drejtues mjetesh, janë denoncuar nga qytetarët se po kryenin manovra të rrezikshme. Shërbimet e Policisë Rrugore kanë reaguar dhe ndaluar menjëherë, dhe nga verifikimet rezultuan se dy prej tyre ishin në gjendje të dehur, përkatësisht shtetasit me iniciale O. S., dhe E. Gj, të cilët u arrestuan në kushtet e flagrancës për veprën penale “Drejtimi i automjeteve në mënyrë të parregullt”, të parashikuar nga neni 291 i Kodit Penal.

#Faleminderitpërbesiminebashkëpunimin

#BashkëShohimMeShumë

#RregulliShpëtonJetë

#DenoncoEdheTi