“U hodhën pronarëve spraj në fytyrë” Çifti i bashkëshortëve tentojnë të vjedhin një argjendari, policia jep informacion

Mesditën e sotme plani i një çifti bashkëshortësh ka dështuar, teksa në një argjendari tentuan të vidhnin me dhunë.

Policia bën me dije se ka arrestuar dy protagonistët që banonin në Vlorë, por ende nuk dihet nëse ndodheshin në qytetin verior vetëm për të vënë në jetë planin e tyre për grabitje.

Sipas uniformave blu në pranga kanë rënë shtetasit A. H., 32 vjeç dhe bashkëshortja e tij, shtetasja A. H., 31 vjeçe, banues në Vlorë.

Ata janë futur në argjendari dhe kanë tentuar të vjedhin me dhunë, duke u hedhur pronarëve të argjendarisë, spraj në fytyrë.

NJOFTIMI ZYRTAR I POLICISE

Tentuan të vidhnin me dhunë, në një argjendari, falë reagimit të menjëhershëm të Policisë, kapen dhe vihen në pranga autorët e dyshuar.

Më datë 27.01.2022, rreth orës 13:00, jemi njoftuar në sallën operative, se dy persona po tentonin të vidhnin në një argjendari në lagjen “Vasil Shanto” Shkodër.

Shërbimet e Policisë kanë shkuar mënjëherë në vendngjarje, ku kanë bërë të mundur neutralizimin dhe kapjen e autorëve të dyshuar, shtetasin A. H., 32 vjeç dhe bashkëshorten e tij, shtetasen A. H., 31 vjeçe, banues në Vlorë, të cilët janë futur në argjendari dhe kanë tentuar të vjedhin me dhunë, duke u hedhur pronarëve të argjendarisë, spraj në fytyrë.

Në cilësinë e provës materiale janë sekuestruar makina që kishin në përdorim këta dy shtetas dhe dy palë targa false.

Grupi hetimor po punon për zbardhjen dhe dokumentimin e plotë të ngjarjes.