Ditën e sotme, është parashikuar shembja e disa ndërtesave në zonën e “5 Majit” për t’i hapur rrugë projektit të rindërtimit.
Policia ka rrethuar zonën që në mëngjes. Banorët e kanë kundërshtuar prej kohësh këtë projekt që nga fillimi dhe prej gati 3 muajsh kanë zhvilluar protesta pasi sipas tyre nuk kanë arritur në një marrëveshje me bashkinë.
Një zonjë ndodhet brenda banesës e cila është parashikuar për tu shembur por nuk pranon të dalë jashtë.
Pavarësisht se policia ka rrethuar shtëpinë dhe po përpiqet të negociojë me të për të dalë bashkë me familjen e saj, zonja nuk pranon të lirojë banesën.
Fadromat e IKMT-së kanë shkuar në zonë, teksa policia ka shoqëruar disa persona.
Forcat policore kanë shoqëruar edhe një operator të televizionit Fax i cili po filmonte.
Policia ka rrethuar menjëherë zonën dhe ka bllokuar çdo hyrje e nuk lejojnë as mediet dhe as banorët e tjerë që të kalojnë.
