“Mos u shërbe mercenarëve të Bashës” U ul në lokalin e PD, Berisha kërkesë të papritur kamarierit

Ish-kryeministri Sali Berisha është ulur në një kafene pranë selisë së Partisë Demokratike, pas deklaratave të forta që lëshoi në oborrin e kësaj godine.

Ashtu siç shihet edhe nga pamjet, Berisha është në lokal, i shoqëruar nga mbështetësit e tij.

Në krah ndodhen Floriana Garo, Bujar Nishani e të tjerë, si dhe gazetarët, të cilëve iu ka kërkuar të lënë mikrofonët dhe të ulen për kafe, meqë siç theksoi vetë ai, nuk i ka ftuar për Vit të Ri.

Gjatë bisedës me gazetarët dhe mbështetësit, Berisha nuk i ka kursyer dhe “thumbat” për Bashën, teksa është shprehur mes të tjerash se “Ku është i zoti i lokalit, kafe mercenarëve të Bashës mos iu servirni, u thoni s’keni punë këtu. Nuk është puna t’i diskriminojmë, por të shkojnë në shtëpitë e tyre, janë në mision të gabuar, misioni ynë ka qëllim t’i shërbejë qytetarëve”.

Më tej, po me ironi, Berisha ka shtuar se “raki në orar të punës në asnjë mënyrë, se trembet Gazi”.

Ndërkohë, jashtë selisë blu ai hodhi akuza të forta ndaj kryedemokratit Lulzim Basha, ndërsa iu bëri thirrje shqiptarëve që t’i bashkohen protestës së nesërme para Partisë Demokratike.