Dalin pamjet nga momenti kur Florian Përvathi ka dalë sot nga Gjykata e Lezhës, pas caktimit të masës “arrest me burg”.
Adoleshenti 17-vjeçar qëlloi me armë zjarri ndaj 65-vjeçarit Lekë Lekëgjonaj duke i marrë jetën.
Përvathi shihet i buzëqeshur duke përshëndetur familjarët e tij.
Adoleshenti vrau Lek Lekgjonaj për gjakmarrje dhe aktin dramatik e planifikonte prej kohësh. Para hetuesve 17-vjeçari është shprehur se armën e kishte siguruar prej një viti, teksa nuk ka shfaqur shenja pendese për krimin që ka kryer.
Vrasja ndodhi në fshatin Manati të Lezhës, ku Përvathi me anë të një pistolete me mulli, shkoi afër banesës së fqinjit të tij Lek Lekgjonaj dhe e qëlloi disa herë duke e lënë të vdekur në vend.
Pas krimit 17-vjeçari ka shkuar në polici dhe ka treguar mbi krimin që kishte bërë. Menjëherë pas kësaj ngjarje, ai është ndaluar ndërsa policia gjeti të vdekur afër banesës 65-vjeçarin Lek Lekgjonaj, vëllai i Ndue Lekgjonaj, që i vrau babanë në vitin 2009, kur ishte vetëm 4-vjeç.
Adoleshenti, prej 13 vitesh ishte jetim. Për të dhe për 2 vëllezërit më të mëdhenj u kujdesën xhaxhai dhe tezja.
