Më në fund lajm i mirë për patentat dhe shqiptarët që jetojnë në Gjermani

Njohja e patentave shqiptare dhe atyre kosovare për emigrantët me banim në Gjermani pritet të bëhet më e lehtë.

Kjo do të diskutohet në mbledhjen e Këshillit Federal, në datën 11 Shkurt. Lajmin e ka njoftuar Besnik Kelmendi, politikan shqiptar në Gjermani, pjesë e CDU-së.

“Ashtu siç ju kam informuar më 6 Janar 2022, mund t’jua them me siguri të plotë se sot zyrtarisht futet në rend ditë për seancën e ardhshme të Bundesratit, më 11 Shkurt 2022 çështja e patentave të shoferëve. Ky është një lajm shumë i mirë për të gjithë bashkëkombasit tanë që jetojnë apo që pretendojnë të zhvendosën në Gjermani”, thotë ai.

Sipas draftit të dorëzuar në fund të muajit dhjetorit në Këshilin Federal, qeveria gjermane propozon njohjen e patentave nga Shqipëria pa provime në teori dhe praktike për pothuajse të gjitha kategoritë:

A1, A2, A, B, BE, C1, C1E, C, CE, D1, D1E, D dhe DE. Vetëm për patentat nga Shqipëria të cilat i përkasin kategorisë AM për konvertimin do të kërkohet provim praktik.

Për lejet e drejtimit nga Kosova është parashikuar konvertimi pa provime shtesë në kategoritë:  AM, A1, A2, A, B, BE, C1, C1E, C, CE, D1, D1E, D dhe DE.