Gazetari investigativ Artan Hoxha ka treguar detaje që nuk u panë nga protesta e 8 janarit në selinë e Partisë Demokratike.
Ai deklaroi se flamujit që morën me vete mbështetësit e ish-kryeministrit Sali Berisha kishin bishta kazme dhe lopate për të patur mundësi të fusnin armë të ftohtë në protestë.
“Flamujt ishin me bishta kazme. Ka një formë jo rrumbullake si bishti i lopatës, Bishtat e kazmës i kishin edhe ata mbrojtësit brenda selisë edhe skuadra e Berishës. Më kujtoi 21 janarin. Ishte ideja për të sjellë një armë të ftohtë në protestë. Në të gjithë protestat e dhunshme në Shqipëri, pjesëmarrja e grave ka qenë shumë e vogël. Kur shoh një protestë me pjesëmarrje 90% meshkuj e kuptoj që do ketë akte dhune”, deklaroi Artan Hoxha.
Ai u shpreh se me t’u futur në seli, mbështetësit e Berishës përdorën trapan në vend të “dashit” metalik, duke shfrytëzuar prizat e godinës për të tentuar të depërtojnë dyert e blinduara.
“Kati i parë ra. Dhe shkuan te shkallët shumë shpejt. Meqë shkuan shpejt te dyert e blinduara ata që e mbronin godinën hodhën gazin brenda. Duke u hedhur brenda krijoi atmosferë mbytëse. Brenda nuk është punuar me dash por me trapan. Ata kanë përdorur prizat, Dera e brendshme ishte më pak e blinduar se dera e jashtme. Efekti i gazit brenda ishte shumë i madh dhe ishte e pamundur të punonin”, tha ai për ABC News.
