Drejtori i Policisë së Shtetit Gledis Nano ka nënshkruar sot një marrëveshje bashkëpunimi me një laborator mjekësor, në favor të efektivëve, familjarëve të tyre, apo të policëve që kanë rënë në krye të detyrës.
Policia e Shtetit, pas marrëveshjes për kryerjen e testit periodik për përdorimin e lëndëve narkotike nga punonjësit e Policisë, ka firmosur një tjetër marrëveshje me administratorin e laboratorit mjekësor z. Thoma Vasili.
Kjo marrëveshje bashkëpunimi konsiston në ofrimin e ekzaminimeve mjekësore me çmime të reduktuara, për punonjësit e Policisë së Shtetit, familjarët e tyre dhe familjarët e të rënëve në detyrë apo për shkak të detyrës.
Drejtor i Përgjithshëm i Policisë së Shtetit Gledis Nano, gjatë nënshkrimit të marrëveshjes, ka falënderuar z. Thoma Vasili, për mundësinë që i është dhënë punonjësve të organizatës që ai drejton, duke u ofruar atyre tarifa të reduktuara për analiza dhe ekzaminime të ndryshme mjekësore.
Administratori Thoma Vasili ka garantuar Drejtorin e Përgjithshëm, për standardet e shërbimeve që ofron subjekti që ai përfaqëson dhe ka siguruar mbështetje për Policinë e Shtetit.
