Ekzekutimi në Tiranë/ Kush ishte objektivi i autorëve? I plagosur dhe kamarieri, vëllai i viktimës në gjendje të rëndë

Dyshohet se objektiv në atentatin e sotëm në Tiranë në lokalin e zonës së “Don Boskos”, me 1 viktimë dhe 4 të plagosur, kanë qenë vëllezërit Çela.

Viktimë mbeti 35 vjeçari Erion Çela ndërsa vëllai i tij Blerim Çela 28 vjeç ka marrë plagë në këmbën e djathtë dhe në fytyrë dhe ndodhet në gjendje të rëndë shëndetësore.

Të plagosur mbetën gjithashtu dhe 4 persona të tjerë të cilët ishin ulur në tavolinë me vëllezërit Çela.

Ata janë identifikuar si shtetasit Arben Dani 46 vjeç i plagosur në këmbë, Edmond Crroj 41-vjeç  i plagosur në bark, njëkohësisht daja i viktimës, si dhe Azbi Selimaj 19 vjeç.

Ky i fundit mësohet se është kamarier në lokalin ku ndodhi ngjarja dhe se ishte në krye të detyrës në momentin që ka marrë plumb në shpatull.

Nga burimet zyrtare mësohet se ata janë qëlluar nga një automjet tip “Benz” i zi me automatik.

Në vendin e ngjarjes ndodhen forcat e policisë të cilat kanë sekuestruar kamerat e sigurisë dhe po marrin në pyetje dëshmitarët e pranishëm në ngjarje.

Gjithashtu janë ngritur pika kontrolli në pikat dalëse të Tiranës.

Paraprakisht dyshohet, se njëri prej autorëve ka dalë nga makina tip “Benz” dhe në këmbë është drejtuar në afërsi të tavolinës ku ndodhej viktima dhe të plagosurit e më pas ka lëshuar mbi to një breshëri kallashnikovi.

Më pas, ai ka hipur sërish në makinë dhe me ndihmën e një personi tjetër është larguar me shpejtësi nga vendngjarja.