Çfarë po ndodh? Serbët në Kosovë udhëtojnë drejt atdheut pas protestës

Qindra qytetarë serbë të Kosovës po kalojnë kufirin në Serbi për të marrë pjesë në referendumin për ndryshimin e Kushtetutës.

Në pikën kufitare të Jarinjës janë parë forca Speciale të Policisë së Kosovës të gatshme për të ndërhyrë në rast nevoje. Serbët e Kosovës do të votojnë në 4 komuna në jug të Serbisë për referendumin kushtetues. Vendimi është marrë ditën e diel nga Komisioni i Zgjedhjeve në Beograd.

Kryetari i komisionit, Vladimir Dimitrijeviç, deklaroi se serbët e Kosovës do të mund të votojnë në Novi Pazar, Rashkë e Vranjë, komuna në jug të Serbisë që ndodhen afër kufirit me Kosovën.

Përmendim që në orët e para të mëngjesit në Mitrovicën e Veriut është mbajtur një protestë e serbëve, drejtuar nga kreu i Listës Serbe, njëherësh ministër në qeverinë “Kurti”, Goran Rakiç.

Ai ka njoftuar se kryetarët e dhjetë komunave me shumicë serbe në Kosovë kanë dalë me një deklaratë të përbashkët.  Rakiç njoftoi se do të vendosin reciprocitet në veri të vendit nëse Qeveria e Kosovës nuk e lejon mbajtjen e zgjedhjeve serbe të 3 prillit.