“Alo, policia, më kanë zënë pritë”! U tall me efektivët, arrestohet konkurrenti i emisionit të dashurisë

Arrestohet ish-konkurrenti i emisionit “It’s my Love” në Kosovë, pasi bëri shaka me policinë në rrjetin social “Tik Tok” sikur i ka dalë dikush në pritë. Policia ka arrestuar ish-konkurrentin e “It’s my Love”, Dardin, për lajmërim të rremë dhe publikim të videos në “Tik Tok”.

Në një video-incizim, të publikuar, ai telefonon policinë sikur po raporton një rast, por ai jep raportim të rremë.

Njoftimi i plotë i policisë:

Policia e Kosovës, si rezultat i angazhimeve dhe hetimeve intensive ka arritur ta identifikojë dhe njëherit ta arrestoi personin e dyshuar (D.M.), i cili ka bërë deklarim të rremë duke kontaktuar Policinë e Kosovës në numër emergjent për kinse nevojë për ndihmë policore dhe pastaj të njëjtat incizime i ka publikuar në Tik Tok, të titulluar (Dardi thirr policin).

Të gjitha hetimet dhe veprimet policore janë ndërmarrë në konsultim dhe koordinim me prokurorin kompetent, ku ndaj personit të dyshuar është iniciuar rasti lajmërim apo kallëzim i rremë dhe i njëjti është dërguar në qendrën e mbajtjes për 48 orë.

Duke parë angazhimet dhe nevojën për veprime policore në ofrimin e ndihmës ndaj qytetarëve që kanë nevojë për prezencë policore, rastet e tilla pengojnë punën policore dhe janë të kundërligjshme, andaj Policia e Kosovës do të ndërmerr masa të menjëhershme ndaj të gjithë personave që mund të përfshihen në raste të tilla.

Policia e Kosovës do të vazhdojë të jetë e përkushtuar në kryerjen e detyrave dhe autorizimeve të saj ligjore dhe kushtetuese si dhe ofrimin e ndihmës dhe sigurisë ndaj të gjithë qytetarëve.