“Të gjitha rrugët monitorohen” Sot nata e Vitit të Ri, Policia e Shtetit del me apelin e fortë

Nata e ndërrimit të vitit ka sjellë edhe fluks  të lartë automjetesh në të gjithë Shqipërinë.

Qytetarët kanë lëvizur për të festuar pranë të afërmve të tyre.

Ndërkohë Policia e Shtetit ka dalë me një apel të fortë për të gjithë shoferët.

Uniformat blu i bëjnë thirrje atyre që të jenë të kujdesshëm dhe të mos drejtojnë mjetet në gjendje të dehur, ndërkohë që paralajmëron se të gjitha akset do të jenë të monitoruara me radarë për shpejtësinë.

NJOFTIMI ZYRTAR I POLICISE

Nisur nga fluksi shumë i lartë i automjeteve, jo vetëm  në qendrat urbane por edhe në akset nacionale dhe rurale, Policia e Shtetit ka rritur prezencën e shërbimeve të Policisë Rrugore dhe ato të Patrullave të Përgjithshme,  duke patrulluar me mjete të paloguara, si dhe po monitorohet qarkullimi i automjeteve me makinën inteligjente, dronë, radarë,  kamera e aparatë fotografik, me qëllim parandalimin e akisdenteve rrugore.

Policia e Shtetit, apelon për të gjithë drejtuesit e mjeteve, që mos kryejnë parakalime të gabuara dhe të qëndrojnë në radhë në ato akse rrugore ku ka lëvizje të ngadaltë për shkak të fluksit të lartë të automjeteve.

Të mos shpejtojnë pasi të gjitha rrugët monitorohen me radarë dhe nga makina inteligjente dhe masa administrative do t’ju shkojë në banesë .

Të vendosin rripin e sigurimit dhe të mos përdorin celularin gjatë drejtimit të mjetit, si dhe drejtuesit e motomjeteve të vendosin kaskën mbrojtëse

Të mos drejtojnë mjetin nën efektin e alkoolit apo në gjendje të dehur. Gjatë natës së ndërrimit të viteve dhe ditëve festive, drejtuesit e automjeteve në rast se do konsumojnë alkool të mos drejtojnë mjetet e tyre, por të përdorin mjetet e transportit publik, pasi Policia e Shtetit do të shtojë monitorimet duke përdorur alkooltestuesit  në të gjitha rrugët e vendit.

Njëkohësisht Policia e Shtetit apelon për zbatim të masave anticovid, dhe për mospërdorim të fishekzjarrëve.

Festoni të gëzuar duke respektuar ligjin

Policia e Shtetit ju uron gëzuar Vitin e Ri, mbarësi e shëndet, më shumë besim e bashkëpunim për një të ardhme më të sigurt.