Sali Berisha: Në Kuvend erdhën njerëz nga dhomat e spitalit për të përmbushur detyrimin!

Ish-kryeministri Berisha ka thënë mbrëmjen e sotme se në Kuvendin e datës 11 Dhjetor kanë ardhur delegatë të PD-së të cilët ishin të shtruar në spital, vetëm që të përmbushnin detyrimin e tyre.

“Pasi i dhamë Shqipërisë për herë të parë Kuvendin e thirrur nga anëtarësia, për të cilin as miq e kundërshtarë nuk bën dot një vrejtje, fakti që Kuvendi u mblodh në stadium, u mblodh sepse ai e kishte bërë qesharak Kuvendin.

Në asnjë rast nuk kam ndërhyrë në çështjet e statutit dhe të brendshme të PD-së, pasi kam patur mendimin që kryetari që ka ardhur ka të drejtë të riformatojë statutin. Përsa i përket Kuvendit, i kam thënë “nuk ke sallë për 7 mijë e ca vetë”. Në Kuvendin tonë ka patur njerëz që kanë ardhur nga dhoma e spitalit për të përmbushur detyrimin”, tha Berisha.

Sa i përket Komisionit të Rithemelimit, Berisha u shpreh se grupi prej 29 anëtarësh do ta drejtojë PD-në deri në datën 22 mars.

“PD-në sot e drejton Kuvendi Kombëtar që u mblodh në datën 11 dhe do e drejtojë deri në 22 mars. Kuvendi ka autorizuar një grup të përkohëshëm prej 29 vetësh, vendimet merren kolegjialisht. Sot grupi është në të 4 anët e Shqiëprisë për të organizuar për herë të parë një ngjarje madhore, referendumin të thirrur tashmë nga Kuvendi i anëtarësisë”, u shpreh ish-kryeministri.