Rrihet mizorisht kundërshtari i presidentit: Më lidhën, më vendosën qese plastike në kokë dhe më goditën pa mëshirë (VIDEO)

Aktivisti opozitar dhe kritiku i Qeverisë së Azerbajxhanit, Tofiq Yaqublu, thotë se është dhunuar rëndë gjatë mbajtjes në ndalim policor, pasi u arrestua në një protestë të mërkurën.

Në një video pas lirimit, ai shihet me mavijosje të rënda rreth syve dhe thotë se oficerët e rrahën barbarisht.

“M’i lidhën duart me pranga pas shpinës, më vendosën një qese plastike në kokë dhe filluan të më rrahnin në mënyrë të pamëshirshme”, tha opozitari.

“Më dukej se po vdisja. E shqeva qesen me dhëmbë që të mund të merrja frymë. Qesja më ishte ngjitur për fytyre”, shtoi ai.

Qeveria e Azerbajxhanit, që gjerësisht është akuzuar për abuzim të të drejtave të njeriut, përfshirë torturën dhe ndalimin arbitrar, i quajti si “të pabaza” pretendimet e aktivistit.