Ka njerëz që besojnë se të moshuarit mjaftohen me pak orë gjumë.
Në fakt, kjo është thjesht një legjendë urbane.
Të gjithë të rriturit kanë nevojë për të paktën 7 deri në 9 orë gjumë.
Ajo që ndodh me kalimin e moshës është se njeriu e ka më të vështirë të flejë siç duhet.
Por kjo nuk do të thotë se nevojat për gjumë ndryshojnë.
Një nga sfidat e plakjes së shëndetshme është garantimi i orëve të mjaftueshme për gjumë.
Si Ndryshon Gjumi Tek Të Moshuarit
Për arsye nga më të ndryshmet, të moshuarit kanë vështirësi në fjetje.
Atyre u nevojitet më shumë kohë t’i zërë gjumi, zgjohen tre deri në katër herë gjatë natës, urinojnë tepër, kanë tendencën të flenë herët në mbremje e të zgjohen po aq herët.
Përse Të Moshuarit Flenë Më Pak
Trupi ndryshon me plakjen dhe këto ndryshime prekin cilësinë dhe kohëzgjatjen e gjumit.
Në këtë të fundit mund të luajnë rol shumë faktorë.
Hormonet
Truri i të moshuarve prodhon më pak melatoninë, që është hormoni i gjumit ndërkohë që hormoni i rritjes sekretohet në nivele më të ulëta.
Ky hormon është arsyeja përse fëmijët flenë aq mirë.
Tek gratë mund të luajë rol edhe menopauza, simptomat e së cilës ndërhyjnë tek gjumi.
Sëmundjet Kronike
Sëmundjet dhe simptomat e tyre ndikojnë direkt tek gjumi.
Për shembull, artriti shkakton dhimbje që pengon ardhjen e gjumit.
Diabeti mund të nxisë nevojën për të urinuar më shpesh gjatë natës.
Sëmundjet e zemrës mund të shkaktojnë zgjim të menjëhershëm gjatë natës për shkak të vështirësisë në frymëmarrje.
Sëmundjet mendore që shoqërohen me ankth kanë tendencën që të ndërhyjnë tek cilësia e gjumit.
Ndryshimet në Stilin e Jetesës
Të moshuarit kryejnë më pak aktivitet fizik dhe qëndrojnë më pak në diell.
Drita e diellit është e nevojshme për prodhimin e melatoninës që rregullon ciklet e gjumit.
Të moshuarit duhet të kalojnë të paktën 2 orë ekspozimi në diell.
Konsumi i alkolit, kafeinës dhe cigares shkakton kaos në cilësinë e gjumit dhe nuk duhen konsumuar të paktën 3 orë përpara fjetjes.
Tek cilësia e gjumit ndërhyjnë edhe medikamentet siç janë ato të tensionit të gjakut, kundër depresionit, e të tjerë./AgroWeb.org
