I shpëtoi vde kjes 7 herë, kush është kroati Frane Selak që në fund fitoi lotarinë

Frane Selak, një qytetar kroat, është një nga njerëzit që konsiderohet si më me fat në botë sepse ka arritur t’i shpëtojë vdekjes 7 herë, ndërkohë që sikur mos të mjaftonte kjo në moshën 74 vjeçare ai fitoi lotarinë.

Ai ka lindur në vitin 1929. Në Janar të vitit 1962 vagoni i trenit në të cilin ndodhej ai, doli nga rruga dhe ra në lumë, duke vrarë të 17 pasagjerët brenda, përveç Franës. Një vit më pas, dera e avionit me të cilin po udhëtonte u shkëput. Frane ra, por për fatin e tij të mirë në një mullar kashte. 19 udhëtarët e tjerë nuk e patën këtë fat, duke humbur jetën kur avioni u rrëzua disa kilometra më larg.

Tre vite më vonë, në vitin 1966, i mbijetoi një aksidenti të rëndë me autobus, me mjetin që humbi kontrollin dhe ra nga ura. 4 viktima nga ky aksident, ndërsa Selak shpëtoi duke dalë në breg të lumit me not. Pas 4 vitesh “pushim”, Frane mbijetoi në një tjetër aksident, kësaj radhe me makinën personale, që mori flakë papritur. Kroati doli shpejt nga makina, që pas 30 sekondash shpërtheu.

Pas tre vitesh, motori i makinës së re që bleu, shpërtheu kur ai po punonte me të. Rezultati, vetëm djegie te flokët dhe asnjë dëmtim i rëndë në kokë. Në vitin 1995, Frane u përplas nga një autobus teksa po kalonte rrugën, por çuditërisht pati vetëm lëndime të lehta.

Një vit më vonë, në vitin 1996, ai i shpëtoi një përplasjeje të shumëfishtë me një kamion të Kombeve të Bashkuara, duke u hedhur nga automjeti në një greminë, por shpëtoi duke u kapur te degët e një peme. Historisë së Frane Salek, e denjë për një film hollivudian, i mungonte “qershia mbi tortë”. Në vitin 2003, vetëm dy ditë pas ditëlindjes së tij të 74-t, fitoi 800 mijë euro në lotari.