Humbën djalin 8 vjeç/ Familja e Mateos merr dhuratën e madhe, një tjetër portret të vogëlushit

Edhe pse i vogli Mateo Vasiu mbylli sytë përgjithmonë në moshën 8-vjeçare për shkak të dhunës së ushtruar nga komshiu i tij Klodian Çalamani, ato që mbeten pas janë kujtimet.

Ato përcillen në forma nga më të ndryshmet, dhe një ndër to është dhe portreti i fëmijës.

Konkretisht sot, në familjen e Mateos ka mbërritur një pikturë e madhe.

Vepra e artit me imazhin e vogëlushit duke buzëqeshur është realizuar nga një djalë nga Shkodra, i cili ka preferuar të mbetet anonim.

Familjarët e Mateos, me gjithë dhimbjen e madhe që janë duke kaluar, kanë mirëpritur dhe falenderojnë nga zemra të riun shkodran për këtë gjest fisnik e tejet domethënës.

Kujtojmë se kjo nuk është hera e parë që ata marrin një pikturë të 8-vjeçarit, pasi para disa ditësh një piktor nga Elbasani iu dhuroi atyre një tjetër portret.