Gazetari investigative Artan Hoxha ka dhënë detaje në lidhje me arrestimin e ish-ministrit të Mjedisit, Lefter Koka, këtë të martë nga SPAK.
Gjatë emisionit “Opinion”, Hoxha tha se oficerët e Policisë e kanë gjetur në një lokal Kokën dhe i kanë komunikuar vendimin.
E më pas kanë shkuar në banesën e tij për të ushtruar kontroll. Megjithatë sipas gazetarit, arrestimi i Kokës, ishte një nga tre dosjet e mëdha që ka SPAK, duke shtuar se nëse çohen deri në fund do të mund të ndryshonin elitën politike.
“Për mua kjo është një nga tre dosjet e mëdha që ka SPAK të cilat nëse çohen deri në fund mund të bëjnë atë që s’kemi bërë këto 30 vjet, mund të ndryshojnë elitën politike. Kjo dosje ka edhe një përfshirje, përveç një hetimi të SPAK, ka pasur edhe presion politik. Ka qenë kauzë e opozitës para zgjedhjeve. Ka qenë një kauzë goxha e madhe. Kam shpresuar që SPAK të vepronte para zgjedhjeve. Kam bindjen që do të kishte ndikim edhe në zgjedhje nëse do të vepronte para zgjedhjeve. U zgjodh kjo kohë, është pjesë e SPAK, nuk e di pse u zgjodh kjo kohë. Vijmë tek veprimet e sotme. Pas lëshimit të urdhrit të vendimit të gjykatës për arrestimin e tre personave është bërë arrestimi sot. Zoti Koka është gjetur në një lokal.
I janë paraqitur diku rreth orës 11:00.I janë paraqitur qetësisht në fakt zyrtarët e policisë dhe i kanë thënë që kemi këtë vendim, do të shkojmë në banesë dhe të bëjmë kontrollin e banesës. Është bërë kontrolli i banesës dhe ai është vënë në dispozicion të hetimit. Padyshim që në Shqipëri jo çdo ditë arrestohen ministra. Ministri i fundit që shkoi kokë turku ishte kokë greku, ishte Spiro Ksera.ai shkoi kokë turku. Në rastin konkret zoti Koka, në këtë histori pa diskutim nuk është koka për mua e gjithë kësaj historie. Për mua hanxhari ka shkuar diku në mes të zinxhirit. Megjithatë ka edhe dosje të tjera në SPAK që mund të ndryshojnë elitën politike çohen deri në fund,”-tha në fjalën e tij gazetari./dosja
