Sot do të mbahet Kuvendi i thirrur nga ish-kreu i qeverisë Sali Berisha. Eventi do të nisë në orën 10:00, ku do të marrin pjesë delegatë, anëtarë dhe simpatizantë të Partisë Demokratike. Prej rreth 3 muajsh ish-kreu demokrat Berisha ka ndërmarrë një aksion në disa qytete të vendit, ku përmes ‘Foltores’ ka kërkuar që të zgjidhet një lider i ri demokrat. “Për një Parti Demokratike, më të hapur, më të fortë dhe më të bashkuar” është motoja e Sali Berishës, i cili ka ftuar demokratët që të marrin pjesë në këtë Kuvend, në ditën e ditëlindjes së 30-të të Partisë Demokratike.
Mbrëmjen e kaluar Berisha, në konferencën e fundit për media nuk harroi pa ftuar edhe liderin e PD-së, Lulzim Basha në këtë organizim.
Aksioni erdhi pas vendimit të SHBA-ve për shpalljen e tij non-grata, masë që pasoi me përjashtimin e tij nga grupi parlamentar i PD-së në 9 shtator. Fill pas kësaj date nisi edhe përplasja me liderin aktual demokrat Lulzim Basha, ndërsa mes dy figurave të rëndësishme brenda demorkatëve nuk kanë munguar akuzat. Basha për t’ju përgjigjur këtij aksioni të Berishës, thirri Kuvendin e PD-së në datën 18 dhjetor.
