“Basha është burracak, nuk ka karakter” Berisha akuza liderit të PD: Sulmoi partnerët tanë të shkëlqyer

Në Kuvendin Kombëtar që po mban në stadiumin “Air Albania”, ish-kryeministri Sali Berisha ka hedhur akuza të forta në drejtim të liderit aktual të Partisë Demokratike, Lulzim Basha.

Sipas tij, Basha nuk kishte karakter që të jepte dorëheqjen, dhe spostoi partinë e vlerave konservatore drejt së majtës, duke pushtuar hapësirat për pronarët dhe ish-të përndjekurit.

“Ai është një burracak, që nuk kishte karakter të jepte dorëheqjen. Përjashtoi drejtues të PD nga funksionet drejtuese, sulmoi në mënyrë të verbër partnerët tanë të shkëlqyer.
Në 8 vite, Lulzim Basha e spostoi partinë e vlerave konservatore drejt të majtës, ai pushtoi hapësirat për pronarët dhe ish-të përndjekurit. Ai e ktheu PD në një fasadë të regjimit të Edi Ramës, sikundër u kujdes që të ruante marrëveshjen që kishte me kreun e meduzës.

Basha në 8 vite u mundua të krijonte Bashizmin në PD, por në fakt ngriti boshizmin. Ai certifikoi vrasjen e shpresës së shqiptarëve. Për të gjitha këto, demokratët iu bashkuan nismës shpëtimtare të Foltores dhe ata vendosën si njerëzit më të lirë të këtij vendi, të rithemelojnë forcën më të lirë, të rithemelojnë Partinë Demokratike, që ne sot de juro e bëjmë realitet”, tha Berisha.