LIGJET E BIZNESIT
Pasi i shkarkoi nga detyrat në parti, Lulzim Basha, ka ndërmarrë një tjetër vendim kundër mbështetësve të Sali Berishës. Report Tv mëson se Basha ka kërkuar edhe largimin e tyre si anëtarë të PD-së në komisionet Parlamentare.
Konkretisht mësohet se Partia Demokratike ka depozituar në kuvend kërkesën për ndryshimin e kryetares së komisionit të shëndetësisë Albana Vokshi dhe disa sekretarëve. Bëhet fjalë për deputetët që janë mbështetës të ish-kryeministrit Berisha.
Në PD ka nisur një betejë e brendshme, ku deputetët janë ndarë në mbështetës të Lulzim Bashës i cili mban sot vulën e partisë, dhe në mbështetës të Sali Berishës, i cili pretendon të marrë partinë duke thënë se Lulzim Basha është shkarkuar në Kuvendin Kombëtar të 11 dhjetorit.
Distancime mes demokratëve ka pasur edhe fizikisht në “shtëpinë” e tyre, ku në seli pretendohet se janë ndryshuar bravat e dyerve në mënyrë që mbështetësit e Berishës tashmë të shkarkuar nga funksionet të mos mund të futen.
