LIGJET E BIZNESIT
Ditën e sotme SPAK vendosi të dërgojë për gjykim dosjen në ngarkim të kryebashkiakut të Mallakastrës, Qerim Ismailaj.
Ky i fundit akuzohet për veprën penale “Falsifikimi i vulave, i stampave ose i formularëve”.
Ndërkohë menjëherë pas këtij vendimi, ka ardhur dhe reagimi i Partisë Demokratike.
Është sekretari i Përgjithshëm Gazment Bardhi, i cili ka sulmuar kryeministrin Edi Rama, ku e akuzon se ka future në politikë modelin e politikanit gangster.
Ai thekson se PD i qëndron bindjes se vendi ynë mund të ecë përpara drejt zhvillimit pa politikanë të korruptuar e të lidhur me krimin.
REAGIMI I PLOTE:
Marrja si i pandehur i uzurpuesit ilegjitim të Bashkisë së Mallakastrës është një akt i mirëpritur drejt pastrimit të politikës. Me kallëzimin tonë në SPAK, pasi treguam me dokumenta se mandati i tij ishte i paligjshëm, PD bëri vetëm detyrën ndaj qytetarëve. Ne i qendrojmë bindjes sonë se mund të ecim përpara drejt zhvillimit pa politikanë të korruptuar e të lidhur me krimin.Të zgjedhurit në parlament, në qeveri dhe në bashki duhet të jenë shërbëtorë vetëm të interesave të qytetarëve. Edi Rama futi në politikë modelin e politikanit gangster, që rri në pushtet në aleancë me krimin. Ky model duhet zhbërë përmes vetingut në politikë. Shqiptarët meritojnë të qeverisen nga politikanë me integritet.
Rikujtojmë se ditën e sotme SPAK vendosi të dërgojë si të pandehur kryetarin e Bashkisë Mallakstër, Qerim Ismailaj, për veprën penale “Falsifikimi i vulave, i stampave ose i formularëve”, duke përshëndetur këtë vendim. SPAK filloi të lëvizë për cështjen në fjalë pas denoncimit të Gazment Bardhit, bërë në gusht të këtij viti. PD e akuzonte Qerim Ismailajn se ka fshehur një dënim prej 3 vitesh të marrë në Greqi, por KQZ nuk pranoi t’i hiqte mandatin e kryetarit të Bashkisë. Prandaj PD vendosi ta padisë në SPAK Ismailajn.
