LIGJET E BIZNESIT
Policia e Tiranës ka arrestuar një 39 vjeçar, pasi është kapur duke shpërndarë kokainë në zona të ndryshme të kryeqytetit.
Për ti shpëtuar uniformave blu, ai përdorte edhe një taksi, duke u kamufluar në këtë mënyrë si punonjës i këtij shërbimi.
Në kuadër të operacionit “Braka” u bë arrestimi në flagrancë i shtetasit E. J., 39 vjeç, i cili merrej me shitje të lëndës narkotike të llojit kokainë në zona të ndryshme të Tiranës, duke e kamufluar aktivitetin e tij kriminal, me një mjet taksi që kishte në përdorim.
Gjatë kontrollit fizik nga shërbimet e Policisë, këtij shtetasi iu gjetën doza me lëndë narkotike kokainë dhe një shumë parash, të cilat u sekuestruan në cilësinë e provës materiale bashkë me mjetin”, njofton Policia.
Gjithashtu, nga shërbimet e Policisë po në kuadër të këtij operacioni janë arrestuar dhe dy vëllezër pasi merreshin me shpërndarjen e hashashit në Tiranë. Bazuar dhe në informacionet e siguruara në rrugë operative, u bë arrestimi në flagrancë i shtetasve: – G. H., 25 vjeç dhe A. H., 20 vjeç (vëllezër).
Këta shtetas, në bashkëpunim me njëri-tjetrin siguronin sasi të konsiderueshme të lëndës narkotike cannabis sativa dhe më pas e shisnin atë në doza të vogla, në zona të ndryshme të Tiranës.
Gjatë kontrollit fizik të ushtruar nga shërbimet e Policisë, këtyre shtetasve iu gjet e iu sekuestrua në cilësinë e provës materiale lëndë e dyshuar cannabis sativa, 1 peshore elektronike, fishekë luftarakë, 1 dorezë metalike (përforcues grushti), dy aparate celularë, 1 patentë dhe kartë ID të dyshuara të falsifikuara.
Materialet procedurale i kaluan Prokurorisë së Shkallës së Parë të Rrethit Gjyqësor Tiranë, për veprat penale “Prodhimi dhe shitja e narkotikëve”, “Falsifikimi i letërnjoftimeve, i vizave ose i pasaportave”, “Mbajtja pa leje e armëve të ftohta” dhe “Mbajtja pa leje e municionit luftarak”.
