“Po kërkonim dyqan ushqimesh” Dënohen me nga 5 vite burg dy shqiptarët në Britaninë e Madhe

Dy emigrantë shqiptarë në Britaninë e Madhe janë dënuar me 5 vite burg nga gjykata.

Ata u kapën në mars të këtij viti teksa blinin një armë  tek një trafikant.

Ngjarja ndodhi në zonën e Liverpoolit.

Sipas mediave britanike, shqiptarët e dënuar janë Sefer Allushi dhe Erald Sida, të cilët janë kapur në flagrancë teksa shkuan në banesën e një personi i cili do u shiste armën.

Tregtari i armëve, James McGlade e kishte fshehur pistoletën tip ME9 në shtëpinë e një bashkëpunëtori.

Në momentin që ata shkuan tek shtëpia, oficerët e policisë ndërhynë duke bërë të mundur arrestimin e dy shqiptarëve.

Ndërkohë, bashkëpunëtori i cili kishte armën, e hodhi nga dritarja e banesës tek kopshti i fqinjit të tij. Por policia arriti ta gjejë dhe nga analizat e bëra, gjetën gjurmë gishtërinjsh të personit në fjalë.

Si pasojë policia arrestoi dhe dy trafikantët e armëve. Përpara gjykatës, shqiptarët mohuan akuzat mbi njohjen me dy personat.

Madje ata u shprehën se nuk ishin nisur të blejnë armë, por po kërkonin një dyqan ushqimesh.