Ka ardhur reagimi i Partisë Demokratike pas akuzave të bëra nga presidenti Ilir Meta drejt liderit të opozitës Lulzim Basha, në lidhje me faktin se ky i fundit kishte bojkotuar zgjedhjet e dekretuara në 13 tetor 2019 edhe pse i kishte kërkuar personalisht.
Me anë të një njoftimi, kjo forcë politike deklaron se këto ishin përpjekje të presidentit për ti përçarë. Në reagim shkruhet gjithashtu se presidenti e kishte përdorur pushtetin në kurriz të demokratëve dhe se këta të fundit nuk kishin asnjë borxh ndaj tij.
Deklaratë e Partisë Demokratike:
Përmes diversionit dhe mashtrimeve, mjetet e tij të zakonshme, Meta tenton të përçajë Partinë Demokratike. Demokratët e njohin mirë atë, ia dinë bëmat dhe gjëmat, se si e përdori pushtetin në kurriz të tyre dhe asnjë përpjekje e ulët për përçarje nuk do t’i funksionojë. Ne demokratët nuk i kemi asnjë borxh dhe nuk ia zgjidhim dot hallet e tij.
