“Nuk e nxora unë Azem Hajdarin në pritë” Dëshmon Izet Haxhia: Para ngjarjes ishte në takim me Sali Berishën

Ditën e sotme Izet Haxhia ka dëshmuar në gjykatë në lidhje me vrasjen e Azem Hajdarit, ngjarje kjo për të cilën është dënuar me burgim të përjetshëm.

Haxhia akuzohet se ka qenë ai që e nxori në pritë themeluesin e Partisë Demokratike.

Por ai deklaroi në sallën e gjyqit se kjo nuk është e vërtetë, teksa shtoi se përpara se të vritej, Azem Hajdari ishte në zyrën e Sali Berishës, kur e lajmëruan se jashtë PD ishte një mjet i mbushur me tritol.

Në momentin që ka dalë, Azem Hajdari ka trokitur në xhamin e mjetit, ku shofer ishte Jaho Mulosmani, me këtë të fundit që nuk ka qëlluar.

Sipas tij, ishte Fatmir Haklaj ai që qëlloi dhe vrau Azem Hajdarin. Haxhia thotë se në momentin e vrasjes ka qenë me Halil Haklajn, vëllain e Fatmirit, ndërsa shton se vrasja e Hajdarit u bë për të rrëzuar nga pushteti Fatos Nanon.

“Nuk e nxora unë Azem Hajdarin në pritë. Para se të vritej, Hajdari ishte në takim me Sali Berishën. Azemi u njoftua se jashtë PD ishte një mjet me tritol. Kur e informoi këshilltari, ishte në zyrën e Berishës. Kur doli te makina, Azemi trokiti te xhami. Jaho Mulosmani ishte shofer i makinës, nuk qëlloi. Ai që qëlloi ishte Fatmir Haklaj. Kur ndodhi ngjarja, unë isha me Halil Haklajn. Unë e Azemi kemi qenë bashkëthemelues të PD. Jam ndjerë shumë i përdorur. Vrasja u bë për të rrëzuar Fatos Nanon. Fatmir Haklaj më tha se nuk kishte shkuar për të vrarë Azemin.”, tha Haxhia.