Dy javë më parë banesa e biznesmenit Nazmi Çangu në Nikël u grabit nga disa persona që terrorizuan të gjithë familjen.
Mësohet se njëri prej autorëve të ngjarjes është identifikuar.
Sipas grupit hetimor, kjo është arritur me anë të ADN së fijeve të flokut në kapelen që policia sekuestroi në vendngjarje, si dhe provat e tjera të mbledhura aty.
Referuar burimeve, mësohet se i dyshuari është me origjinë nga Laçi dhe jeton në Tiranë. Për arrestimin e tij, policia organizoi pak ditë më parë një operacion në një zonë periferike të kryeqytetit, por në momentin e ndërhyrjes ai i shpëtoi forcave të rendit.
Si ndodhi ngjarja?
Ngjarja ka ndodhur në orën 1 të natës, ku 10 persona të armatosur dhe të maskuar kanë hyrë në banesë dhe kanë vjedhur mbi 100 mijë euro. Grabitësit e maskuar pasi kanë mbyllur në një nga dhomat e banesës gruan dhe 4 fëmijët, më pas kanë marrë biznesmenin Nazim Çangu, të cilin e kanë rrahur, dhunuar dhe gjuajtur me qytën e armë. Duke e kërcënuar që të tregonte për çelësin e kasafortës, ata i kanë prerë edhe njërin gisht me gërshërë. Ata kanë arritur të marrin çelësin e kasafortës ku mbante paratë dhe sendet me vlerë.Grabitësit kanë marrë para kesh dhe florinj, që arrijnë vlerën e mbi 100 mijë eurove.
