Tre ditë më parë një aksident tragjik i mori jetën 3 anëtarëve të një familje shqiptare në Greqi.
I vetmi i mbijetuar i familjes ishte djali, ndërsa nëna, i ati dhe motra e tij fatkeqësisht humbën jetën.17-vjeçari, i cili doli i gjallë nga makina e aksidentuar ku ndodhej bashkë me prinderit dhe motrën ka folur për mediat greke, ndërsa ka zbuluar edhe detaje rreth aksidentit.
Ai ka deklaruar për emisionin “Të vërtetat me Zinën” se ata po ktheheshin nga Shqipëria dhe një moment dëgjoi nënën dhe motrën e tij të bërtisnin dhe pastaj një përplasje të fortë.
Nga aksidenti vdiqën dy prindërit dhe vajza e tyre, kurse 17-vjeçari u nxorr nga makina me disa dëmtime të lehta.
“Po vinim nga Shqipëria dhe fillimisht ndaluam në Meteora. Pastaj u futëm në një rrugë dhe babai po udhëtonte me 60-80 km/h. Unë po shihja nga dritarja e makinës dhe dëgjova një bori, dhe pastaj mamin dhe motrën të bërtisnin. Nuk pata kohë të kthej kokën pasi u përplasëm. Pas nesh vinte xhaxhi dhe ai më nxorri nga makina. Pash familjen time dhe mendova që ishin pa ndjenja dhe do të përmendeshin më vonë, por në spital me thanë që i kisha humbur ata”, mësohet se ka deklaruar ai.
Nga aksidenti, i riu ka thyer dorën dhe këmbën,por fatmirësisht gjendja e tij është e qendrueshme.
“Kam thyer dorën dhe këmbën dhe do të më duhen tre operacione që të rikthehem në gjendjen e mëparshme. Në momentin e përplasjes mendova se u goditëm nga një makinë, por kishte qenë kamion. Mbaj mend që makina jonë rrëshkiti pak para përplasjes”, ka deklaruar 17-vjeçari shqiptar.
