Humb jetën nga virusi mësuesja 40-vjeçare në Elbasan

Një mësuese në Elbasan ka ndërruar jetë si pasojë e Covid-19. Blerina Lamçja ndërroi jetë në moshën 40-vjeçare pasi nuk e fitoi betejën me sëmundjen. Lajmin e bën me dije ministrja e Arsimit, Evis Kushi.

Në mesazhin e saj,  Kushi bën dhe një herë thirrje për të mos neglizhuar vaksinimin, si mënyra më e mirë për të shmangur rrezikun e këtij virusi.

STATUSI I PLOTË I MINISTRES EVIS KUSHI:

“Të dashur miq,

Jam shumë e hidhëruar për ndarjen nga jeta të mësueses Blerina Lamçja (Hoxholli) në shkollën speciale “Zëra Jete” në Elbasan. Blerina e humbi betejën me Covid-19 në moshën 40-vjeçare, duke lënë pas trishtim jo vetëm tek familja e saj, kolegët dhe miqtë që e kanë njohur nga afër, por edhe nxënësit e shkollës, për të cilët Blerina punonte me aq shumë përkushtim e dashuri.

Ky lajm duhet të na ndërgjegjësojë të gjithëve që rreziku nga virusi është ende mes nesh, prandaj shërben si një apel i fortë që të mos i neglizhojmë për asnjë moment vaksinimin dhe respektimin e protokolleve shëndetësore.”