Mëngjesi i 26 nëntorit i vitit 2019 ishte një mëngjes i errët për të gjithë shqiptarët. Vendi u trondit nga një tërmet i cili nuk kurseu, gra, të moshuar madje dhe fëmijë të cilët sapo kishin filluar të thurnin ëndrrat për jetën e tyre, ëndrra të cilat u prenë në mes nga lëkundjet e forta.
51 qytetarë humbën jetën duke lënë pas kështu një dhimbje të madhe jo vetëm te familjarët e tyre por në çdo familje shqiptari.
Ndonëse dy vite më pas të gjithëve na shfaqen para syve pallatet e shembura, shtëpitë, shkollat, thirrjet dëshpëruese të familjareve qe të afërmit i kishin nën rrënoja, sirenat e autoambulancave, policisë, zjarrfikësve, ushtrisë, të cilat ushtonin ngado.
Shqipëria u kthye në qendër të raportimeve të mediave botërore, shqiptarët, vendet fqinje nisën mobilizimin e shpejtë për ti ardhur në ndihmë vendit tonë.
Sot, dy vite pas, ndonëse shtëpitë e shkatërruara janë ringritur, dhimbja vijon të jetë e freskët.
