Zgjidhje e zgjuar/ “Ejani dhe qani” Shpiket enkas një dhomë në qytet për ata që janë në humor të keq

Në një nga ndërtesat në qendër të qytetit të Madridit është hapur një dhomë që quhet “La Lloreria”.

Kjo e fundit është pjesë e një projekti që synon të theksojë rëndësinë e shëndetit mendor dhe ti japë fund stigmës për të shkuar te psikologu.

“Ejani dhe qani”, një nga shenjat në këtë hapësirë ​​të krijuar posaçërisht u thotë vizitorëve të saj.

“Edhe unë jam në ankth”, thuhet në një shenjë tjetër rozë të ndezur.

Në një cep janë telefonat me emrat e njerëzve që mund të telefononi kur jeni në humor të keq, përfshirë një psikolog.

Dhoma është e hapur për të gjithë, dhe me të organizatorët e projektit duan të heqin stigmën në shoqëri lidhur me shëndetin mendor, të qarat dhe të kërkojnë ndihmë.

“Është një ide vërtet e mrekullueshme të vizualizosh problemin e shëndetit mendor.

E qara është stigmatizuar në Spanjë si dhe në shumë vende të tjera,” tha Jon Nelssom, një student suedez që jeton në kryeqytetin spanjoll, raporton Reuters.

Shtatë ditë më parë, kryeministri spanjoll Pedro Sanchez njoftoi shpërndarjen e 100 milion eurove që do të përdoren për të përmirësuar kujdesin e shëndetit mendor, i cili do të përfshijë shërbime të tilla si një linjë telefonike 24-orëshe për parandalimin e vetëvrasjeve.

“Nuk është një tabu, është një problem i shëndetit publik për të cilin duhet të flasim, ta bëjmë të dukshëm dhe të veprojmë në përputhje me rrethanat,” tha ai për sëmundjet mendore kur filloi planin më 10 tetor, Dita Botërore e Shëndetit Mendor.