Shërbimi për Çështjet e Brendshme dhe Ankesat (SHÇBA) në Ministrinë e Brendshme do të shkrihet, teksa Policia e Shtetit dhe Garda do të kontrollohet nga një strukturë e re, që do të quhet Agjencia e Mbikëqyrjes Policore. Kështu parashikon projekt/ligji i përgatitur nga Ministria e Brendshme që e prezantoi në Komisionin e Ligjeve ditën e sotme, ministri i Brendshëm Bledi Çuçi.
Agjencia e Mbikëqyrjes Policore do të ketë më shumë kompetenca se sa SHÇBA. Konkretisht, ministri u shpreh se agjencia ka si objekt parandalimin, zbulimin dhe hetimin e shkeljeve administrative dhe veprave penale në polici dhe gardë, inspektimin, shqyrtimin dhe trajtimin e ankesave, procesin e Vetingut në polici si dhe verifikimin e punonjësve mbi plotësimin e kushteve për pajisjen me certifikatë sigurie. Detyrat e reja të Agjencisë janë Vetingu dhe certifikatat e sigurisë.
Shërbimi për Çështjet e Brendshme dhe Ankesat u krijua me ligj në 2014, duke zëvendësuar Shërbimin e Kontrollit të Brendshëm (SHKB).
