Identifikohen dhe shpallen në kërkim nga policia dhe prokuroria dy personat që ndodheshin në bordin e avionit i cili tre javë më parë u rrëzua në zonën e Vermoshit në Malësinë e Madhe.
Sipas burimeve pranë grupit hetimorë të dy shtetasit janë shqiptarë.
Identifikimi i tyre është bërë pak ditë më parë në sajë të përgjigjes së ADN-së për shenjat e gishtave të fiksuara në avion, si dhe mbetjet biologjike të fiksuara aty.
Për shkak të hetimeve, emrat e dy të kërkuarve nuk bëhen me dije. Kjo pasi grupi hetimor është duke punuar për të zbuluar dhe identifikuar edhe personat e tjerë që ndihmuan për t’i larguar prej andej.
Policia ka mundur të sigurojë prova për mjetin tip fuoristradë, por ende nuk kanë rënë në gjurmët e shoferit.
Dyshohet se avioni po përdorej për transport droge dhe ra nga mbipesha.
Hetuesit po verifikojnë njëkohësisht nëse sasia prej 300 kg marijuanë e sekuestruar në Mal të Zi, vetëm një ditë pas rrëzimit të avionit kanë ose jo lidhje me njëra-tjetrën.
